民主黨喺區選中，好多候選人都係輸幾十票到幾票，認真唔好運，估唔到連主席劉慧卿都受黑氣影響。噚日立法會有個討論調整明年立法會選舉開支上限嘅小組，卿姐爭取做主席，獲4票贊成，與建制派支持嘅謝偉俊同票數，結果要由公民黨梁家傑抽籤決定，結果卿姐輸咗，主席由謝偉俊做。
不過卿姐似乎黑唔晒，話說佢3個幾月前請阿瑟王（King Arthur）李國章出席佢網台節目，當時阿瑟王請咗卿姐食檸檬，噚日阿瑟王現身立法會午宴，卿姐再問阿瑟王幾時接受佢訪問，阿瑟王答應喺政府宣佈校委會主席人選後上卿姐個節目，不過佢就話唔會喺節目錄影完後答記者問題。
卿姐向八方引述阿瑟王話，「我（李國章）畀你（卿姐）獨家，唔好請記者嚟啦」，阿瑟王教卿姐耍走記者，話佢趕住走咪得囉！卿姐都係記者出身，點會肯過阿瑟王呢，到底阿瑟王會否走數，大家拭目以待。