眾所周知，「超人」李嘉誠愛戴Citizen手錶，原來佢仲有一個小習慣，就係將手錶時間撥快半粒鐘。超人解釋話，萬一忘記某個appointment，喺香港地，無論去邊度，半小時實到，所以就有呢個習慣嘞。
守時真係好基本，華華最討厭人遲到，理得你係普通人還是超人，遲到就唔啱，奉旨遲到嘅人直情衰到冇朋友。
咁點解超人忽然講起手錶呢？話說超人早前接受彭博電視訪問，講完脫歐、經濟、下屆特首等世界大事，主持人就八卦佢手上隻Citizen手錶。

獨愛Citizen啱粗戴

超人話，佢呢隻黑色Citizen幾年前換，大約500美元（3,900港元），物料輕得嚟又實用，具備太陽能充電同防水功能，方便佢去游水、打波或者做乜運動都好，如果戴住一隻十萬銀嘅錶，佢就要戴得小心翼翼，好唔爽啫。
主持人單刀直入問超人，有冇試過俾朋友取笑？超人就以英文神回：「They know my character.」
其實唔少富豪都戴普通錶，好似日本Uniqlo創辦人柳井正，聽講佢日日戴Swatch，新地（016）大股東郭炳江就鍾意幾百蚊電子膠錶！都係嗰句，戴乜錶唔重要，最重要係守時。

李華華
mailto:[email protected]