當年今日

股海實戰錄:數碼通水位唔多

蘋果日報 2002/01/25 00:00


港股噚日高開低收,已經連續9個交易日跌穿50日線,有逐漸拋離之勢。趙飛雲嘅主觀願望係港股過農曆年前可以先反彈,大眾股民過年可以開心啲。如果噚晚格老發表看好經濟前景言論,將有利港股先行反彈,若然能迅速抽番上50日線(11316)之上,港股將現曙光,否則最樂觀亦要跌至1萬點,至完成今次調整。
呢兩日睇住裕元(551)及利豐(494)等美國概念股上升,趙飛雲雖然冇買,但並無太大後悔,因為呢類基金股升跌完全由大戶控制,要跌起嚟亦會好急,好容易因小失大。倉內嘅太平協和(438)由贏錢變輸錢,不過近兩日回吐,成交唔算大,雖然係咁,亦要打醒精神睇住,跌穿6毫子要先計數。至於深圳國際(152)暫時都係窄幅牛皮,可以揸住先。

Sunday候28仙低吸
早排提過嘅數碼通(315)愈升愈有,噚日大升0.80元,收11.05元。高盛調高數碼通2002年盈利預測,由每股蝕5仙變為盈利12仙,難怪數碼通急升,不過高盛嘅5個月目標價11.50元,以現價計,水位認真有限。趙飛雲情願吼吓隻Sunday(866),等佢跌近28仙可以買番啲。