周日(24日)沙田最尾第10場二班1400米，「以奇用兵」久休復出，可唔可以保持不敗取得六連捷，固然係焦點，但呢場有另一個話題，就係幾匹三歲馬「錶之太陽」、「協勝神駒」同「美麗寶貝」首度較量，呢三匹馬好大機會喺下季四歲馬大賽鬥過你死我活，今日絕對係前哨戰。

潘頓騎開「錶之太陽」同「美麗寶貝」，後駒今場負118磅，潘頓啱啱去完馬爾代夫度假，要造磅有困難，選騎負121磅嘅「錶之太陽」至少減磅唔駛咁辛苦，結果「美麗寶貝」就落喺史卓豐手上，咁啱豐豐賽前曾替「協勝神駒」試閘同快跳，對兩駒嘅底蘊都有基本概念。

有時真係左右造人難，史卓豐話要喺「美麗寶貝」、「協勝神駒」揀其中一隻，而同場忠心鐵馬「世界紀錄」亦由佢騎開，今場有冇揀錯馬，佢都話自己眼光未必百份百準確。最終選擇「美麗寶貝」，原因除咗前仗由佢操刀贏馬，最關鍵係「美麗寶貝」嗰場擊敗高質明星馬「志同道合」。

「志同道合」日前出戰二班1600米，如果唔係直路一度被困，極有機會砌低「精明才子」贏馬，所以用「志同道合」做指標，豐豐推斷「美麗寶貝」即使今仗初跑二班，依然好有惡氣，佢亦有信心「美麗寶貝」會有精彩演出，希望自己下季可策此駒進軍四歲馬大賽。