台灣天團五月天將於5月再踏紅館開騷，舉行十場「五月天JustRockIt!!2016香港演唱會」，延續同歌迷第十次嘅五月之約，之前信用卡優先訂飛秒速爆晒，噚晚主辦機構特高娛樂喺網上公布，門票將於4月6日公開發售，每人限購2張！今日佢哋喺官網再公布，將限購2張改為4張：「昨天公告演唱會門票，將於4月6日起公開售票的資訊後，收到不少歌迷的意見及反映。現我們主辦方決定，與票站溝通，將原定每人每次限購2張門票，更改為每次限購4張。」

以為可以平息五迷鼓譟，點知網友分成兩批，有彈有讚，大部份五迷都留言狂插：「變4張...入場機率即時降低，明益黃牛。」、「仲十咩年之約，紅館外見就有我哋份，真心喊出嚟。」、「我支持每次限買2張，起碼買到飛入場機會多啲。」、「你們應解決排隊黨問題，最好是有香港身份証人優先買票，來香港開演唱會，是應香港人優先才是。」、「黃牛幫見你賣兩張，加咗不只一倍人手排緊隊，而家你仲要變四張，你間公司係咪想玩x香港真.五迷！」、「那有沒有想過改期發售那幾天文憑試，中六的學生還怎麼去排隊。」今次真係順得哥情失嫂意。