「Captain Nancy」薛家燕一連兩場《愛你無限60年演唱會》噚晚喺紅館開鑼，圈中廣結人緣嘅家燕姐，台上台下都有唔少朋友捧場，台下有曾江夫婦、歐陽震華夫婦、叻哥夫婦、Bob、姜麗文、吳若希同老公、黑妹、盧海鵬、蓋鳴暉、馬海倫、陳曼娜、朱慧敏同米雪等，甫開場家燕姐就喺台中升起跳住十字步唱《Captain Nancy》。

至於台上打頭陣就有胡楓、黎小田、陳欣健同家燕姐合唱，三個都講笑話以前好想追家燕姐，仲要家燕姐喺三人之中選擇老公、情人同朋友，結果家燕話姐：「老公梗係揀修哥啦！夠晒長情，情人當然係陳欣健，有型又溫柔，至於黎小田，我哋都係做朋友啦。」

其後家燕姐換上啡色閃閃長裙唱出《真情》，佢話呢套劇係佢人生嘅轉捩點，然後再請出羅嘉良合唱《難兄難弟》，家燕姐表示多謝嘉良專程喺北京返港，好記得以前一齊登台同拍劇嘅日子，之後就到林保怡現身合唱《陪著你走》。

一輪嘉賓助慶後，就到七公主嘅馮素波、沈芝華、陳寶珠、王愛明出場，佢哋同家燕姐合體唱出《情花開》同《莫負青春》，家燕姐再三多謝姊妹們，馮素波就話：「得啦！家燕，唔使咁長氣，我哋幾個加埋幾百歲。」

雖然四公主蕭芳芳缺席，但現場有播出芳芳姐嘅錄音，芳芳姐首先恭賀家燕開騷，然後話：「希望到你入行100年再開騷同早日嫁出去。」幾姊妹聽完後即刻笑住同家燕姐話：「你年頭娶新袍，年尾又開騷，俾我哋唞吓先，你遲啲先嫁啦。」隨後寶珠姐再同家燕合唱一曲《花院盟香》。

家燕姐主理嘅藝術中心嘅一班小朋友都有參與演出，分別跟胡琳、王梓軒同家燕姐同台表演。隨後就換上火紅色拉丁舞衣，同謝天華大跳辣身舞。68歲嘅家燕姐跳起嚟毫不遜色，兩人面貼面邊跳邊唱《再共舞》，尾段天華更抱起家燕姐，觀眾睇到拍爛手掌。

熱舞過後就到古巨基現身，基仔向家燕姐話好想摸吓佢額頭上粒癦，全場觀眾尖叫，最後基仔三度摸家燕姐粒癦，接住兩人再手拖手到台邊同觀眾握手。

家燕姐嘅三位仔女喺尾段上台獻花兼向媽咪唱《You Raise Me Up》，旁邊嘅家燕姐已經忍唔住感動落淚，家燕姐話：「真係好感動，細個嗰陣人哋話佢哋三個係包袱，連黎小田都係咁講，但我覺得佢哋係我嘅推動力，令我用盡力去養大佢哋，有人問我做嘢做到每日瞓得四個鐘攰唔攰？我話我係唔可以攰。」

Encore環節有王祖藍、阮兆祥同李思捷嘅福祿壽出場合唱《熱情的沙漠》，仲同家燕姐一齊教現場觀眾跳十字步，為演出劃上句號。

精選娛聞，喺晒《娛果》
http://fb.com/appledailyent