《2018亞洲小姐競選香港賽區》10位入圍佳麗今日喺旺角出席一間健身中心開幕，同場仲有澳門小姐麥嘉欣同來自德國嘅奧運體操金牌得主阮馬素。活動中，大會要求阮馬素即場選出心水嘅三甲，阮馬素望咗佳麗一輪，係咁話「好困難」，不過最終揀咗3號張靜茵。

事後張靜茵表示好開心：「我覺得佢（阮馬素）好犀利，向自己目標進發，覺得佢好成功，佢揀我，我好榮幸；信心當然大咗，但我覺得自己優勝之處係笑容吸引，面對傳媒都好放鬆。」10月舉行嘅亞姐香港區決賽，問佢有乜才藝表演？張靜茵話：「我本身係鋼琴演奏級，所以會表演彈琴，噚日10號風球，喺屋企練琴，台上一分鐘，台下十年功。」有冇邊位佳麗係對佢有威脅？張靜茵表示冇諗過，因為要專心應付比賽，佢認為其他佳麗都好好。

阮馬素透露此行留港三日，今朝先飛嚟香港，好彩颱風走咗，笑言好幸運。講到佢嘅亞姐心水佳麗係張靜茵，係咪因爲對方笑容夠吸引？阮馬素話：「是整體的感覺，我喜歡運動型，因為我生活圈子都是圍繞運動。」稍後，阮馬素要參與德國一個比賽，所以此行如有空餘時間，佢要操體能。

問到澳門小姐麥嘉欣嘅審美準則？佢表示最重要係儀態、談吐同catwalk，「好期待睇佢哋嗰晚（決賽）嘅表現。」麥嘉欣又透露今朝由澳門搭船來港，佢話：「澳門區內冇塞車，而且好彩活動係下晝，噚日澳門個風好勁，我住大廈，雖然唔高，但完全覺得幢樓搖晃，連水都搖。（窗邊有冇滲水？）去年經歷過天鴿，之後換晒啲窗，因為啲窗好舊。」

精選娛聞，喺晒《娛果》
http://fb.com/appledailyent