吳啟華、陶大宇、蘇永康、張文慈等人，今日喺西環出席金牌監製鄧特希新劇《隱世者們》飯聚，雖然呢套劇喺大台盒子播緊，不過套劇喺馬來西亞打破咗當地呢兩年嘅收視紀錄。

問到會唔會添食？蘇永康話：「鄧生啲劇一定有伏線，佢都話有120個劇本喺腦度，唔知佢開乜，等佢指令，叫我哋實返嚟！」佢哋表示新一代觀眾因為《隱世》而睇番鄧特希以前監製過嘅劇集《壹號皇庭》、《妙手仁心》，蘇永康大讚鄧特希劇本風格係一句廢話都冇，節奏又快，但喺出面拍劇就有好多不必要嘅沙石，佢仲話：「不過有啲朋友睇開香港電視廣播有限公司嘅戲，會唔會覺得快得滯，當然啦，百貨『養』百客。」陶大宇直指鄧特希劇係快、狠、準！

至於會唔會去馬來西亞答謝觀眾？吳啟華話：「要問鄧生，最好接騷，有得搵錢，又可以去旅行。」最近接拍網絡電影嘅吳啟華密密搵銀，佢透露喺香港同大陸都有物業，稍後有意喺外國置業，佢話：「囡囡o依家2年級，讀完小學可能會去外國升學。」

對於吳啟華同前妻石洋子離婚兩年，但有報道指啟華喺3個月前再追求前妻，早前仲去日本沖繩旅行，吳啟華表示同前妻保持好關係。係咪會復合？佢笑住話：「我唔係好想轉，過慣單身，覺得好舒服同好自由。」囡囡想唔想父母復合？吳啟華話：「佢未明咩結婚同離婚，將來佢問起先解釋俾佢聽。」現時拍散拖嘅佢，直言好怕受束縛，怕控制唔到長遠嘅關係，而且又怕煩，佢笑住話：「我寧願做浪子，我經歷過兩次（婚姻），家庭自己搞唔掂，囡囡又有一個，o依家幾好。」有冇叫前妻搵個伴？佢即刻話：「冇刻意叫，等佢自己發展。」雖然兩公婆分開，但吳啟華喺經濟上會繼續對佢哋嘅照顧，佢笑指：「做男人係咁，我係為女人而生活。」此外，張文慈喺劇中飾演吳啟華前妻，問到有冇親熱戲？佢話：「冇呀，我係客串，對手戲好少。」