當年今日
關於我們

【賢仔Call馬】最近突然轉模式 唔似陪跑咁簡單(廖浩賢)

蘋果日報 2018/09/18 21:15

蔡約翰廖浩賢邊個邊個賢仔call馬

目前尚未開齋馬房有五個,包括鄭俊偉、大摩、蘇保羅、蔡約翰和文家良,老實講,摩、蔡、蘇都從來唔擔心,馬房實力雄厚,兵源充足。
而從化開幕後,三大倉口都有馬北上訓練,似乎三位倉主都在摸索階段,其中蔡約翰馬房的操練模式,最值得思考及研究。
自從蔡神仙在香港打響名堂之後,大部份練者都會以其操馬模式作為藍本,旗下馬基本上年終無休日日操練,行機、游水、細圈慢踱、下午再出機坪踱步。
快跳只兩段慢時間,平均隔兩個星期一課大閘,慢火煎魚式操練,偶有一隻半隻拍跳,純粹新馬要熟識環境。
而從化訓練又如何呢?先搵「好利運來」做例子,7月17日上從化,正常工夫,反而沒有試大閘,只安排兩課彈草閘。
9月6日彈完最後一課閘便安排回港,隔一個星期上陣,結果跑落一滴都冇,可以話新馬未熟,亦可以話蔡約翰仍在摸索另一套操練。
再搵今次有份列陣的「邊個邊個」做比較,跟「好利運來」一齊北上,初期一樣只安排彈草閘,埋門突然轉換模式,9月6至13日短短一個星期內,連續兩課大閘,工夫明顯與別不同。
今日(18日)仍在從化再跳多課,今個星期六(22日)即將初次上陣,預計48小時內會運回沙田,名氣馬評81分,馬房未開齋,斷估唔似陪跑咁簡單。