小妹最近養咗隻迷你史納莎狗,但冇養狗嘅經驗,有時見佢對住我係咁吠,都唔明佢想表達啲乜。如果有部好似動畫電影《沖天救兵》裏面嘅狗狗繙譯機,綁喺條頸,狗話變人話,咁就好囉。點知專售日本潮流產品嘅JCshop老闆Alan打電話嚟,話喺日本引入咗玩具製造商TakaraTomy狗語言繙譯機。
咁正?小妹飛身去佢間舖吓。Alan話,呢部機已經係第二代,第一代02年喺日本開賣好鬼哄動,攞咗搞笑諾貝爾獎。呢部新機比舊款機功能勁好多,分別由內置咪高風繙譯器及無線手提顯示屏組成。繙譯器掛喺狗頸,當狗吠叫,部機會將狗吠聲錄低,就將數據傳送到手提顯示屏。部機可繙譯56種狗種,包括6種混種狗,能譯出1,200句狗話,大約表達狗狗六種心情如興奮、寂寞、失望、慾望等,「仲有埋圖示同真係發聲功能㖭。」