樂易玲之前先至話,無綫節目老少咸宜,又話TVB係龍頭大哥,唔係因為霸道,而是做得好先有呢o的收視。仲話無綫劇一定要正面,暗踩對台王維基「製作公司」嗰啲太偏鋒,樂小姐話唔敢俾自己個仔睇。
咁噚晚套《名媛望族》就一定一定好正面,最尾兩集簡直係男人懺情大典,單係劉松仁認錯認以前花心,都已經認咗一集嘅時間。兩集戲重點,除咗睇回憶,仲有睇男人點樣跪同認錯懺悔。
1.先係一開始劉松仁向韓馬利認錯,多謝佢咁多年嚟嘅包容。
2.之後再向朱晨麗認錯,呢次冇跪;但之後就拉埋朱晨麗一齊跪喺韓馬利面前,話以後一齊好好照顧大媽。
3.吳卓羲喺樹林伏到朱晨麗,向佢跪低認錯
4.韓馬利死,不孝子王浩信跪喺家門前認錯。
5.王浩信向李思欣跪低認錯,話以後唔再傷害佢同腹中兒子。
6.王浩信返鍾家,向劉松仁跪低認錯。
7.最後嗰場,回憶中,劉松仁跪低向楊怡求婚。
8.仍然係最後嗰場,現實中,劉松仁下跪,再次向楊怡求婚。
兩集劇約82分鐘,total班男人跪咗7次。又話男兒膝下有黃金,監製安排眾男咁樣左跪右跪,可能就係為咗凸顯班男人幾咁尊重女性。
或者CCTVB應該學梁振英的語言偽術:「我冇講過呢套唔係膠劇。」真係膠到,都冇咩網民想鬧或者討論,就連點解堂堂大狀劉松仁都冇醫學常識、唔識幫韓馬利做心外壓救番佢,大家都費事鬧。不過就有網民講咗發人深省之語﹕「原來夕陽可以殺死人。」的確,無綫劇中,死於夕陽之下嘅角色,亦真係太多。好似《義海豪情》嘅鄧萃雯啦,《大時代》嘅周慧敏啦……《烈火雄心》都係交代王喜阿媽羅冠蘭喺海邊睇日落時離世……或者,噚晚鄒凱光已代表大家講晒一切。
一人一票投蘋果【萬千星虧】,發動蘋民力量,對撼CCTVB公投↓↓↓
http://tv-voting.appledaily.com/