【輸收視贏口碑】「星爺愛將」李尚正潛入1蚊兩日團做臥底 妹頭最想衝出大陸
蘋果日報 2019/08/28 06:00
周星馳收視李尚正盧頌恩香港開電視臥底旅行團2.0
香港開電視已啟播兩年，自家製節目少之又少，難得有一個經典節目可以無限loop。早前拍板開拍《臥底旅行團2.0》，由元祖級的「阿正」李尚正和「妹頭」盧頌恩繼續玩盡大陸Cheap Cheap團，即創下香港開電視開台以來最高收視佳績，有4.3點（約28萬人）。相比無綫同時段播出由港姐冠軍麥明詩（MMC）和馮盈盈（FYY）主持的《荷蘭好玩》在8月11日的跨平台總收視的8.6點（約56萬人），對「獨大」無綫來說，單位數字成績可謂差強人意。
雖然與大台的「點數」還差一截，但對開電視卻是很大鼓舞，李尚正和妹頭更成為福將，阿正笑說：「我個人覺得有觀眾欣賞已經贏咗，咁我當然更加希望可以同FYY同MMC合作，咁就雙贏喇！」妹頭則說：「大家唔同玩法，冇諗過會要比較，希望《臥底》都可以好似佢哋咁，一樣咁多後生仔睇。」二人異口同聲表示希望開續集時可以衝出大陸，妹頭說：「其實我哋差唔多玩晒啲大陸團㗎喇，最平1蚊兩日，即5毫子日到3,000幾蚊嘅旅行團都玩過，如果可以提高啲budget進化到去世界各地就更好。」
妹頭直言最難忘1蚊兩日團，她說：「有啲仲叫送禮團，1蚊到19蚊團都有，總之好平。去一日就會帶你去購物點聽書，聽完仲有篋同埋吸塵機送畀你，有時仲會送麻雀、真空煲嗰啲。用時間換禮物咁，我哋一行8人就有8個篋，好實用。通常去好多購物點我哋都會失手，因為又唔係貴，例如竹炭毛巾、底褲，廿幾蚊pack點都買啲返嚟。」但不是每次都咁多著數，阿正曾遇過不少驚險事，他說：「都遇過一啲近似黑社會式嘅壓迫銷售手法，好似賣珠寶。又試過俾人兇我，喺鏡頭後叫你『小心啲呀。』但亦明白咁影係唔好，始終我哋係冇經過人同意去拍嘢，但我哋都會驚。」
如今的開電視側重財經新聞，只剩下5位合約藝人，而阿正和妹頭都是由有線年代開始。阿正更是因為在有線主持節目，表現生鬼，被星爺周星馳賞識，他說：「我嗰陣得23、24歲，梗係受寵若驚啦，去到星輝(星爺公司)但原來唔係拍戲，而係幫手度劇本。我以前喺大學讀到Year 3，因為懶，又唔識諗，仲有一年半畢業都冇讀落去，去咗有線做暑期工。以前娛樂新聞台啲報道稿全部自己寫，仲同林海峰先生一齊做過節目，佢(星爺公司)就覺得我好另類，所以搵我。」
問到有沒有被星爺粗口問候過？他說：「冇喎，因為佢知一鬧你就驚，所以唔會太鬧。」他憶述當年拍《美人魚》扮公安，拎住一幅美人魚圖畫的鏡頭，足足拍了十幾個鐘，他笑說：「換埋衫都唔會知自己做乜，佢(星爺)就係要到時先慢慢爆，正常拍十幾個take已經唔想拍，但周生就係有辦法去鞭策你。」他透露已完成《美人魚2》拍攝，但未知上映日期。既為星爺愛將，妹頭即爆料指阿正是全台最高薪藝人，阿正死口不認，笑說：「剛續約兩年，希望公司再多啲投資，大家有機會拍劇，就再加人工啦。」
採訪：嵐山
攝影：沈健程
攝錄：廖達燊