然而,朋友最近去了上海投資博覽,告知當地較受歡迎的投資項目,並不是港股,而是外滙、商品、外國房地產,甚至係內地股債。港股仍然是受冷落的一群,聽落好似係一個壞消息,因為我哋相信股市已有內地大媽資金湧入,此消息與現實有點落差。不過這對一眾炒友來說是一個好消息,因為我哋之前擔憂大市會一口氣炒爆的問題並不存在,而且大市喺高位尋找支持位的時候,中細價股群龍起舞,每日都有細價股由朝升到晚,最少有三四成升幅。剛好研發多時的軟件今轉可大派用場,每朝掃完待爆股,日內破位入,收市前減持或盡沽,利潤已很不錯,港股已多年沒有出現這些機會。
上周五港股收市後,中證監再次收緊融資融券,目的是壓制內地股市融資餘額之增長,現時內地股市融資餘額已逾1.75萬億人民幣,比起去年同期約4,000億元,勁增3倍多。受新加坡A50指數大跌逾5%拖累,本港夜期應聲插705點,收報26975點,H期更傷,插3.4%,收報14016點。中證監並指,內地股民不可只想着股票是用來炒的,完全不理會長線投資的回報及風險,希望市場會變得更理性。這句說話看似老掉牙,但完全把內地官員的思維反映出來,股市升得太快,他們會壓,但他們要牛市,所以又不會想把大市壓死,他們要一隻慢牛,不想出現一隻狂牛。
經此一壓,港股應該要回一回氣。值得留意的係,內地首隻透過港股通來港投資的基金,或於今個星期起開始建倉,假如同類型基金也於未來兩個星期建倉,港股很快又會重新凝聚力量,挑戰下一個高位,因此短期大市調整係吸貨良機,等待支持位出現後,就可以放心買貨。
另外我哋一直好鍾意嘅港交所(388),上周曾見300元大關,成交訊號表示過於活躍,於是我300元沽了,從積極推介至今升了一倍多,但我都係立心走一走位,打算喺270元的水平左右搵到支持位後買番,一路入到255元。正如文首所講,內地主流投資者並未對港股有太大興趣,但本地成交金額已衝逾二千億元,若好似當年自由行咁,一步一步咁增加,成交逾五千億元應該不是夢,而港交所最大開支就係人工同維持系統,全部都係固定開支,固幾可肯定,假如成交暢旺下去,其盈利增長應該係藍籌股之中數一數二,點可以唔補回。
張士佳