現年32歲嘅韓國女星李多海，自2014年拍攝韓劇《Hotel King》後喺國內一直未有新作，不過李多海就Keep住上綜藝節目，增加曝光率，早前擔任tvN綜藝節目《人生酒家》嘉賓大談歌手男友SE7EN，近日就孖朴詩妍、李美淑等女星拍攝KBS新綜藝節目《寄宿房的女兒們》。

節目於今晚首播，今日眾人率先現身發佈會造勢。喺一眾女星都着裙亮相時，李多海就選擇中型打扮，一身黑色西裝Look現身，更谷胸微露事業線，成功搶鏡。不過就有網民認為李多海今日個妝就唔多襯佢，顯得佢好似老咗咁，亦有網民認為淡紫色嘅唇妝令佢顯得唔夠精神，同節目組之前影落嘅宣傳照及花絮照有啲唔同。

另外，《人生酒家》主持人之一嘅申東燁，今日現身時就大爆李多海同SE7EN嘅事：「當時節目拍到零晨2點先拍完，不過SE7EN依然親自到錄影場地接女友，令我好驚訝。」認真甜蜜。