大老闆最初不只是篤信名牌，亦有意借此效應讓傳統業務發揚光大。遂一馬當先打頭陣，大手科水落叠，以收拋磚引玉之效，吸引其他貴客參與。所謂輸誰的都不可輸老闆的，客戶經理們見此自然不敢怠慢。可惜，不知是生不逢時還是地硬，入市時正好遇上阿爺收水，即係前年10月前後恒指逼近25000點之時。其後一路接收新錢到開倉，正好又是去年首季指數幾度反彈再上24000之際，結果今天望番轉頭，就係完全Bingo，買中了近兩年港股的幾個重要頂部。
買錯中伏唔緊要，人誰無過。但當你標榜係對冲基金，兩邊買齊玩Long/Short係自然應變之道。只要在波動市中不賭單邊或做足對冲，都不會跑輸大市。遇上阿爺收緊銀根之餘、歐債又屢成炒落藉口兼萬試萬靈，形勢比人強，也屬非戰之罪。可是，有善於閱讀條文的客戶，在落叠前竟仔細把基金份Mandate閱覽一遍，發現原來號稱對冲基金的投資策略，係只可Long不可Short，還要完全不揸現金。
如此，客戶經理們恍然大悟，明白當問及為何不沽出倉中一隻因醜聞纏身爆煲的民企時，名牌專家竟然仍以「凡事要看長線」來為自己的死硬派策略開脫。聽聞這名去年輸足三成兼遠遠跑輸的名牌揸Fit人，後來更被大老闆捉住食晏兼照肺三粒鐘。當然最受罪的，還是一班押注於名牌身上的客戶經理，要幫名牌專家頂住啲客嘅粗口。
胡孟青
獨立股評人