合和噚日發咗個通告，話胡應湘辭任董事總經理，由老拍檔何炳章頂上；胡只保留主席個位。另外，佢個仔胡文新就升任營運總裁。好明顯，呢個係等個乖仔上位接班嘅安排。
胡應湘係第一代基建專家，畢業於普林斯頓，乃特首最器重嘅美國精英，最近政府再委任佢同馮國經、吳光正一齊做亞太經合組織商務諮委會香港代表。此外，胡應湘亦兼物流局、港口基建委會，理工校董會等等大堆公職，佢自合和退下火線，肯定唔係因為老。
不過啲官就煩，事關胡應湘向來敢言，且不留情面，好似佢話「香港啲物流九流」，話「官字兩個口、高官四個口，特區高官七個口」，都激到班官長跳跳吓。如今佢更得閒，同傳媒講多啲嘢，唔煩就有鬼。
（圖）胡應湘從合和火線退下，專心搞公職。


E-mail：[email protected]