有做過Startup的朋友向我呻，他加入了一家大公司，而公司近年想轉型，除了投資Startup之餘更想自己搞一間，希望以Startup的模式去經營，帶來新朝氣，而這個朋友就被找來將子公司當Startup去做。但加入後他就發現，這都只是偽．Startup，一開始老闆說有多放手，但公司一座座古老石山的既有體制仍是不能動搖。

「以前請人只要個人醒目、做到野、熱血有心做，即日就可以出到offer。但依架想請個人都要過五關斬六將，搵咗個人返嚟，就偏偏過唔到HR個關，又要後生但又嫌人唔夠經驗，又嫌人貴。最離譜就係佢竟然走嚟同我講，你條team個同事咁廢你都function到，即係唔急可以慢慢請啦。」

「如果淨係要間公司function到，咁炒晒你班HR都得，只要有會計出糧就得啦！」說得差點就將手中酒杯拍碎，結果請了兩個月都未請到合適人選，但上頭交落的項目下月就要開始。

亦曾有不少例子，大公司HR為「堅守」Budget。部門主管要加人工留人，明知下屬做得野，但就underpaid，出到去隨即可加四、五成人工。明明如今加兩成就可以留人，但就被HR難為，只可以加一成，最終下屬當然另謀高就，而HR請回來的人亦要比原來位同事人工高兩成才請到人，還花上不少時間。

Startup到底點請人？不同腦細都有不同style，不同的stage更加不同的需求，Startup spirit、外國大學畢業、肯學肯做、轉數快、表達能力好等等。腦細T就主將人分為兩類，一類是「打工」，另一類是「做事」，前者適合在大公司做一粒齒輪，後者就適合早期的Startup 齊齊打江山。

「冇話邊個啱唔啱，只係喺唔同Stage要唔同人，而家我梗係要人打江山，如果你想hea吓hea吓搵份糧，就千祈唔好入startup啦！」曾試過介紹朋友予腦細T識，見面談了一小時，T已經想即場搶人過檔，開口直接講「你如果過嚟，我可以offer 你而家人工2倍、3倍。」

撰文：黎兆沖
筆者為證監會持牌人士

http://fb.com/stallone.lai88

investMAN
For People of Style & Substance
掌握理財智慧 感受生活品味
http://facebook.com/investMAN.hk