陳豪同森美再續HeHe情緣， 一齊為電影《比得兔》配音，兩人今日現身太古城一間戲院出席首映禮，森美指今次與陳豪繼續HeHe，不過係配音時配到「嘻嘻哈哈」，陳豪指上次劇集係自己作主動，今次相反由森美作為主動，皆因森美聲演角色（比得）較招積，經常蝦聲演表弟（賓仔）嘅陳豪。

首次踩入配音界，陳豪笑指係挑戰森美強項，全程配音要高音演繹，有別於平日沉實聲線，陳豪笑言：「我自己都認唔到把聲，我以前係聲沙，做咗手術後把聲又變高咗，所以我係高音嘅。」森美指入錄音室時，以為賓仔把聲係專業配音員配嘅樣版，當知道高key係陳豪之後好驚喜：「我即刻問配音領班，陳豪係咪揑住男人凸出部位去配，即係喉核。」陳豪笑指做咗爸爸之後成日要高key講BB話，可能訓練得多，陳豪仲話有興趣繼續接觸配音工作。

另外，陳豪話今個復活節假會留返嚟陪伴仔女，亦有計劃一家外遊，講到劉倩婷想撮合自己囡囡同陳豪大仔做朋友，陳豪哈哈大笑，對於有指佢曾向李承責請教生仔陣，他笑指：「冇呢件事」。身邊森美指陳豪跟免仔有一共通點，係生殖能力強。

精選娛聞，喺晒《娛果》
http://fb.com/appledailyent