樂隊RubberBand（RB）喺前日同噚日，假灣仔伊館舉行兩場「RubberBandLIVEATQ.E.S.2014」演唱會，兩場騷都圓滿結束。

開騷前，RB事先聲明是次演唱會，純粹以歌會友，所以舞台冇升降台機關、冇舞蹈員勁歌熱舞、亦冇華麗歌衫，佢哋只會專心唱歌。圈中好友側田、黃偉文及小肥等捧場睇騷。

由6號清唱《坦白》揭開序幕，接著泥鯭獨唱《Hello》，然後全隊合唱《Hero》時，惜字如金嘅阿正，打頭陣獨唱幾句，台下歌迷興奮尖叫，之後6號首次表演秘密練兵嘅結他，自彈自唱，有板有眼。

一口氣唱咗幾首歌，6號笑說：「大家好，我哋RubberBand，今日係一個講好少嘢，純粹唱歌嘅音樂會，希望唔好悶親你哋﹗」接著當RB唱《瞬間看地球》時，6號請台下觀眾企起身，佢哋都乖乖聽話，然後唱連串快歌時，觀眾都high爆手舞足蹈。

當唱到《心照一生》後，6號感性地表示：「呢首歌好肉麻，係2013年夏天寫，當中第二句歌詞（『始終軟弱拖累太多』）就係講我自己，當時諗到隊友，好怕拖累別人。我講嘢唔叻又肉麻，憑歌詞表達。每個人生命有長短，但冇人可以將生命倒帶，呢段日子令我思考好多。」

演唱會「安哥」時，RB向台前幕後致謝，6號仲公開多謝老婆，此時佢又再感性表示：「RubberBand真係好懶，開好少騷，咁多年嚟得到咁多『知音』，佢哋唔係Fans，係『知音』，因為坐得喺度，都有返咁上下.....我又講錯嘢!」觀眾爆笑，佢又話：「總之無論時代好與壞，我哋會寫多啲正量歌畀大家。」

騷後RB接受訪問，異口同聲表示好開心，6號笑說：「我哋真係相隔太耐無開演唱會，唔知觀眾反應，好多歌手朋友都話開騷好難叫觀眾企起身，可能要叫好多次，點知一叫就起晒身，仲一齊跳舞!」阿正獨唱時獲得觀眾掌聲，泥鯭笑指他是「偶像派」，不過阿正坦言唔會因此多獨唱，佢仲話開騷前食太多臭豆腐，搞到肚脹脹，阿偉笑說：「阿正唔止係今日食多咗，佢平時都食唔少。」