電訊股一向具抗跌力，尤其跌市下，其高息及不受經濟周期影響的特性，屬避險之選。不過，過去半年如不幸買入中國聯通（762）或中國電信（728）卻輸得慘烈，聯通由年初17元水平跌至上周最低的9.45元，勁跌44%，中電信同期跌幅約18%，雖然冇咁傷，但作為避險股，即使買中都要輸。
買聯通輸錢，怨不得人，皆因聯通是去年表現最差股份之一，在手機要大量補貼兼盈利要待上客量增長，冇咁快派出好業績之下，跌得勁亦無可厚非。不過若比較其他電訊股，中國移動（941）固然仍徘徊52周高位，和電香港（215）亦相當強勢，歐洲電訊股亦唔差，Vodafone剛創出幾年新高，08年低位以來升幅近倍。
電訊股的發展關鍵，是iPhone及其他智能電話的流行，令手機上網需求大增，一機在手，上網需要幾乎等同於每日三餐，一日唔上網可能已經同世界隔絕。
因此，已鋪好線的電訊商，在這個趨勢之下紛紛進入收成期，股價創新高只是遲早問題。

聯通的問題，在於仍要頂爛市以大補貼去爭客，捱得過這段補貼期，方可步入收成期，從近日聯通3G上客量止跌回升，可見公司有迹象撐過了最艱難時期，只等大行做齊工夫，股價要再砌高應該唔太難。
買電訊股迎接手機上網狂潮，大方向思路應該冇錯，問題是買聯通有冇揀錯。純睇往績，聯通的確有風光日子，博股價轉勢，應該諗得過。

歐陽風