香港娛樂圈日漸背靠祖國，人民幣至上。自從有團體喺日前發起反佔中簽名運動之後，有唔少藝人都公開表示支持反佔中，表表者梗係有惠州市政協委員陳小春啦，小春咁愛國愛港，由「山雞」變為政協唔係冇原因。

其他藝人就仲有莊思敏、吳家樂等等囉，但原來仲有個反佔中忠實擁護者，登凳——佢就係麥潔文，亦即係江華太太。佢呢個7月不時喺facebook到share有關反佔中、包括「幫港出聲」fb專頁嘅訊息，例如7月4日佢就話：「我一定一定支持！去簽一個一生人最有意義的名！不要以為我們是沈默，我們是尊重不同聲音的人。謝謝這個簽名運動，讓我可以發聲！！」

麥潔文再寫道:「原來現在是登記階段，728才正式簽名運動開始，請大家留意登記咗的電郵通知。不過，剛剛知道原來已經很多有心人湧躍登記，為的是要申明自己的意願，說明我們不是沉默，我們是要明確表達我們需要一個有秩序的社會。」

之後麥潔文又分別再喺13日喺facebook分享「幫港出聲」嘅po，激情四射道:「為我的良心去支持！！」今日又些牙「反佔中」主題曲《同舟之情》MV，感歎道:「他們都說了我心中的說話，就是～同舟之情。我們真的要停一停想一想，到底是什麼令到香港變得如此不講理？有人為了私利，用盡方法搞亂社會秩序，利用年青人的熱情和理想去衝繫(擊)法治，可恥！請用真心去簽你的名，香港係你我都有份的。」

喬靖夫亦有於fb回應反佔中嘅馬蹄露一席話，佢寫道:「馬蹄露話，想改變社會，應該好好讀書，第時選到特首咪得囉……佢似乎完全唔知道，響『愛國愛港』緊箍咒下，特首先至係最改變唔到社會嘅人！因為鳥籠政治裡面，能夠出選嘅只有效忠中共而非香港人嘅傀儡！香港太多人就係咁，連根本問題都未搞清楚，盲盅盅去『反暴力』，但完全唔明白我哋依家面對嘅就係不見血嘅『國家級暴力』！」