二○一五年開壞頭,睇新聞就感覺天下大亂,這邊廂各國爭相減息怕蝕底,搞到滙市奇chok,那邊廂獵頭族磨刀霍霍,視人命如草芥,令人不安。睇格局今年真係危機四伏,星火隨時可以燎原,操盤見唔對路要果斷斬纜,盲拖無意思。
以上月為例,市場幾單大嘢,先有瑞郎突然減息兼脫歐,及至歐洲央行落實QE,都推動各國踩油減息,連前月狂加息挽狂瀾的俄羅斯,上周五亦投降掉頭減息兩厘保經濟,令期內減息央行數目,兩隻手都數唔晒。美元升勢已持續逾半年,近期單邊市更極端,歐元、瑞郎、澳紐加幣上月均跌逾5%,鐘擺效應遲早出現,尤其是美國上周五公佈的GDP走樣,加上強美元對美企造成的滙兌損失逐漸浮面,沽非美慎防「落」極生悲。