美斯同女友…吖係老婆安東莉娜先真,上周五已經喺阿根廷羅沙里奧拉埋天窗,不過,佢哋依然新聞多多,其中因為喺婚禮上面美斯媽咪施莉亞同安東莉娜「撞衫」,阿根廷傳媒就大炒特炒佢哋婆媳不和,睇嚟美斯有排頭痕。
可能你會覺得施莉亞條晚禮服同安東莉娜嘅婚紗唔多似喎,不過,原來喺西方,特別係阿根廷,佢哋都有一個傳統,就係喺婚禮上面其他嘉賓都唔會著白色或其他好淺色的服裝,以免搶咗新娘嘅風頭;而幫施莉亞設計今次晚禮服嘅時裝設計師哥辛奴亦強調條晚禮服係深色嘅,點知突然變咗銀白色,所以外界就估計係施莉亞有心搶安東莉娜風頭。畢竟,施莉亞原來一向都唔多鍾意安東莉娜,就算安東莉娜同美斯生咗兩個仔,施莉亞就覺得美斯可以搵個好啲嘅另一半,所以安東莉娜同施莉亞亦冇乜計傾囉。