當年今日
關於我們
隔牆有耳:無國界記者西環抗議 - 李八方
蘋果日報 2007/12/11 00:00
無國界記者代表去中聯辦請願,抗議中方唔發簽證畀佢哋入境。
張志華攝
仲有八個月北京奧運就開幕,噚日係世界人權日,關注世界各地新聞自由嘅國際組織「無國界記者」噚日派咗五個代表去西環,向中聯辦請願。佢哋話原本預計去北京抗議,但中方拒絕畀簽證佢哋入境,佢哋仲知道當中有人已被列入黑名單,反映中國政府根本冇遵守申奧時改善人權同新聞自由所作嘅承諾。無國界記者代表要求,中國政府喺奧運前應先釋放過百名獄中嘅記者同互聯網異見人士。八方都希望,北京奧運唔單止係中國國力嘅展示,更重要嘅係通過辦奧,中國成為真正開放、進步同文明嘅現代大國。