韓國女團少女時代隊長泰妍噚晚開始、一連兩晚於亞博館Hall 10舉行個人演唱會《TAEYEON solo concert "PERSONA" in HONG KONG》，演唱《I》、《Rain》、《Fine》等人氣歌，唱足近兩個半小時兼哂美腿冧港迷。

泰妍表示之前《MAMA》頒獎禮時嚟過香港，當時有好多歌手同其他歌手嘅粉絲，因此見到有支持佢嘅粉紅色螢光棒時真係好開心，又話：「(今次)一個人嚟海外進行solo演出係孤單嘅，所以粉絲嘅支持係非常重要。」泰妍又表示：「香港係個人巡演嘅最後一站，本身只係演出一場，因為大家嘅支持，所以可以開兩場，好多謝大家。」泰妍非常識做，又做心心手勢又送飛吻，仲話買咗本關於香港嘅書睇，睇吓有咩美食。

演唱會期間，台下不時有粉絲用韓文大嗌「我哋結婚啦！」，現年28歲嘅泰妍就表示：「但我唔想結住。」又話：「結婚嘅環節完咗演唱會之後講。」另外粉絲用螢光棒砌出彩虹嘅顏色，泰妍之後用廣東話不停講「太靚啦」。亦有粉絲戴上日本動畫《千與千尋》無臉男嘅面具睇騷，成功引起泰妍注意。

泰妍更提到今次演唱會有family zone，暗示因為係巡演最後一站，所以有家人出席撐場。泰妍於演唱會尾聲時表示：「首次海外個人巡演，學咗好多，諗到之後要為大家準備啲咩。」佢笑言雖然係巡演最後一站，不過佢唔會喊:「咁幸福嘅時間點會喊?」仲承諾一世都做歌手，好好報答大家，之後跟台下粉絲影大合照。

不過去到encore演唱《Time Lapse》時，泰妍就因為耳機聽唔到而甩嘴，佢就立即從頭唱多次，之後再唱埋《Curtain Call》先正式完場。