今次(27日)沙田日馬編跑11場，兩泥九草，採用Ｃ跑道角逐，蔣嘉琦晨課墮馬受傷座騎全易配，羅理雅是受惠者，原先坐騎已甚強，加多了「祥勝駿駒」及「香江穩勝」兩匹實力馬，可優先留意。

第三場四班1000米，「祥勝駿駒」上仗已全力推介，但陣上一錯再錯，起步一對前腳並舉，因而出閘緩慢，途中亦連番受阻，然末段仍能後追殺上，負於「蓋世之寶」而跟「和平開心」成平頭亞軍，末段交22秒50全組最快拉士，這場若非嚴重失誤，應該已取得季內第二win。今次繼續出爭首本直路賽，埋門於周一朝，落草地跳了一課，拉士衝得好快，為免消耗體力，故唔做最後試跑可以理解，原先繼續用蔣嘉琦，如今換上羅理雅，變相加強了配搭，對發揮這匹重口岳頭馬，應更有幫助。

同場「葵涌老友」勤操進度滿意，試閘有追勢，此駒有形有格，狀態進度唔曳，在此組已夠用。「首映」兩戰都唔曳，排得靚檔會好好跑，可爭三甲。「錶之星」是標準短途快馬，直路大閘能拍住「運財童子」同到，勤操勇態已備。「蓋世之寶」始終是新勝馬，復課保持進度，當然有能力介入爭拼。「洪荒駿駒」試閘推騎，狀態屬初起。「八心之煌」跑多了，恐體力不支。