第十屆亞洲電影大獎今日喺澳門威尼斯人酒店舉行，唔少日韓導演同藝人都有嚟參加，韓國女子組合A-Pink擔任表演嘉賓，佢哋今日接受訪問，話可以參加呢個盛典感到好榮幸，一定會以最佳狀態表演。曾經演出過韓劇《請回答1997》嘅A-Pink主音鄭恩地，被問到對同系列嘅《請回答1988》感覺時，佢話：「有收看，好欣賞，李東輝的演出好出色！」問到6位成員有沒有收看近期收視極佳嘅《太陽的後裔》？鄭恩地話：「有留意，我們都有煲劇，基本上都有追看。」

日籍導演是枝裕和憑《海街女孩日記》入選角逐亞洲電影大獎最佳導演，問佢有否信心得獎？佢表示：「能否獲獎我不太介意，今次能夠與一班好演員和導演一起參與盛會，覺得相當榮幸，特別是侯孝賢，他十分值得尊敬，從他的電影令我加深認識中港台。」

韓星李秉憲憑《寒流黑金》獲男主角提名，同甄子丹、馮小剛一較高下，問佢有冇信心得獎，佢話：「幾年前我是頒獎嘉賓，想不到今年是入圍角逐，順其自然啦！子丹和我之前已見過面，希望將來可以有機會合作啦！」被問到美國奧斯卡頒獎禮以三個小孩橋段嚟諷刺亞洲人，問他有何意見？他說：「不一定是指亞洲人，還有很多少數族裔，我沒看頒獎禮，所以不清楚，很難回應。」

劉亞仁獲大會頒發NextGenerationAward，佢話：「今次得獎好開心，多謝大家對我的期望和關心，以後我會為自己的演出負責任。」劉亞仁自言睇港片大嘅，所以佢都好希望將來有機嚟香港拍戲，佢倆位好友宋慧喬與宋仲基演出的《太》劇受歡迎，佢亦為兩人感到高興，並表示：「我有在社交網放上《太》劇海報，之前在宋慧喬生日會，我跟她說會送一份禮物給她，後來我就去了客串這齣劇，不過我覺得自己演得一都不帥。」