由於馬會要交場俾政府做渠務工程，所以谷草提前聽晚煞科，回想去季嘅呢晚，葉楚航以一W之微險勝告東尼首嘗冠軍滋味，而告東尼唔係「牛精好友」影相僅輸俾「卡達聖」嘅話，呢個冠軍唔會擦身而過，間接講打碎佢冠軍夢嘅係大摩而唔係阿航！
家陣告東尼仍然為冠軍而努力，佢同蔡、方、摩進行拉鋸戰，每一W都係咁重要，除咗佢哋四個，對追緊數嘅吳、孫、胡、李亦一樣重要，尤其係今季12W有11W喺谷草贏嘅Gary吳定強，冇咗谷草呢塊福地對佢都咪話冇影響！至於Almond李易達亦係一樣，去季嘅煞科戰起孖，聽晚佢成手惡馬佈陣，「八喜」贏完匆匆再跑，「歡笑多多」初跑四班，「皇龍戰駒」評分創新低，「一見鍾情」落番三班，全部都係餐士面，真係要睇佢造化如何！至於平日冇乜馬騎嘅湯智傑，前季谷草煞科有W有P，原因係要爭表現續牌，家陣情況亦一樣，所以今期佢騎「美麗飛翔」、「鴻圖戰士」真係博得過！