超人電視進軍內地廣告和味 - 李八方

蘋果日報 2002/07/12 00:00


李嘉誠都話要大搞傳媒,可見傳媒業幾好搵;有人聞言,就話八方發緊夢,香港傳媒蝕多賺少,唔明白點解重有人肯落重本。呢種觀點,同七年前《蘋果》開檔前啲人唔明白一樣,因為佢哋連其他報業集團年報都冇睇過,唔知《南華早報》當年賺七億,以前五年,拉勻每年都賺逾五億,其他中文傳媒盈利也億億聲。

中央台一年廣告逾50億
八方睇過新出版嘅《現代廣告》第七期,大家睇睇附表就知道,如果打開內地市場,廣告收入幾和味。排第一位嘅仍然係中央電視台,舊年有五十四億元人民幣(約港幣五十億九千萬元)廣告,不過增長只有百分之零點九三,因為其他新興競爭對手好勁。
第二位係舊年十一月先組成嘅上海文廣新聞傳媒集團,屬下有十一個電視頻道、十個廣播頻率、三報一刊加一個網,舊年廣告收入十七億二千八百萬元;北京電視台穩守第三位,廣告收入升咗六成三;另外以前無排名嘅廣州電視台同廣東電視台,分別以十億元同七億元廣告收入,分列第四位同第七位。
以李超人能耐,殺入內地市場只係時間問題,印公仔紙(Tom仔股票)換個電視台,認真化算。


傳真︰2623-9278
電郵︰[email protected]