星期三中午，鄭大班召吃午飯，自不然係到大班飯堂——即香港會。大班約咗兩位世姪、世姪女，講去美國升讀大學之事。啲老友記講親下一代升學留學，就諗起左丁山，益咗我有飯食！本來重有議員S嘅，但佢要準備下晝開會，臨時唔得閒嚟，事關人大釋法，曾司長到立法會做護法，好緊要啫，議員S唔吃午飯，都好正常。
大家傾得高興之至，世姪女乃係加州名校校友，對留學加州，瞭如指掌，左丁山既學嘢，又有餐食，真係要多得大班關照。

點知第二朝晨早，打開《蘋果》頭版，竟然見到大班張相，為之嚇咗一驚——又俾人斬？好彩，只係淋紅油啫。啲匪徒要恐嚇大班，情報確係犀利。好多大班老友，包括左丁山在內，都唔知道大班與朋友喺柯達大廈開咗一間貿易公司，大班雖然大口，但有時好口密，從來冇響我哋面前講過甚麼貿易公司。但係竟然有人走上門淋紅油喎，可見呢啲人事先做足功夫，諗落都幾得人驚。
黃毓民俾人打，麵舖俾人淋紅油，案件仍在審訊之際，鄭大班又俾人恐嚇，香港今日城中，竟是何家天下，法紀何存？兩個人嘅共通點好少，惟有一點相同，就係近來支持政改普選不遺餘力。咁都會得罪人？假如「光明頂」嘅法師陶傑都俾人淋紅油，其他大聲疾呼支持○七普選嘅人被淋紅油，《蘋果》被淋紅油嘅話，趁樓價高，賣樓移民，用腳投票可也。