當年今日
關於我們

【日本天災】雨僑基仔搵到方法逃離大阪 天佑撲緊機票 

蘋果日報 2018/09/06 14:50

雨僑古巨基颱風飛燕徐天佑

超強颱風「飛燕」襲西日本,關西國際機場嚴重水浸關閉,雨僑同老公羅力威、古巨基夫婦仍滯留大阪,徐天佑夫婦就被困京都,全部都要改去其他機場撲機票返港。
雨僑夫婦原訂於明天搭HKexpress航班返港,惟航空公司遲遲未公布安排,雨僑決定改訂Hong Kong airline,後日由宮崎飛返港:「依家當地情況好亂,公共交通工具都冇位呀,連車都驚租唔到,惟有改去宮崎飛返香港,呢個係最好辦法,東京、福岡、名古屋機位都要排到10幾號,票價升到萬幾蚊一張,一票難求!」
一行五人訂到從宮崎返港航班,雨僑說:「我哋冇帶國際車牌,JR要轉四五程之餘唔係近,要推住幾個喼,都要搭大半日車,而搭巴士就要一晚通頂坐13個鐘。其實我唔敢包宮崎走係最好嘅選擇,只係咁好彩有五個機位同所有公共交通工具嘅位,而且價錢合理。」
連日來雨僑喺大阪撞到好多香港人,大家喺餐廳傾下點返香港。今日大阪市面已逐漸回復正常,但北海道卻於凌晨發生6.7級強烈地震,多個地方出現山泥傾瀉,有建築倒塌,死亡人數增至8人!身在大阪嘅雨僑祝福日本,以短訊回覆:「Pray for japan!希望唔好再有餘震,都希望無論遊客定居民大家都可以平平安安!」
至於滯留大阪嘅基仔昨晚在ig留言:「來報個平安,各位不用擔心!」問到撲唔撲到機票返港?基仔以短訊回覆:「搞到,從名古屋回港。」而被困京都嘅徐天佑在社交網貼相並留言:「要轉去第二個機場返香港,留多幾日周圍行下。」天佑回覆《蘋果》表示:「依家仲搞緊機票,不過都要盡快返,因為有工作呀!見到日本民眾在大災難後仍處變不驚,積極面對的態度和精神,非常感動!令我從中學習很多。希望佢地可以快點重拾生活!平安!」
精選娛聞,喺晒《娛果》
http://fb.com/appledailyent
empty
滯留京都嘅天佑周圍行打發時間(網上圖片)
empty
雨僑在櫃枱查詢情況
empty
身在大阪嘅基仔在社交網報平安
empty
雨僑話大阪市面已回復平靜