【蘋果25】壹傳媒遭TVB封殺7年 最強公關曾醒明遺憾未能化解積怨
蘋果日報 2020/06/21 00:00
無綫蘋果日報封殺曾醒明
曾醒明，前無綫企業傳訊部宣傳科副總監，服務無綫42年，見盡電視城風雲，也看着《蘋果日報》的創刊及成長。
1973年，曾醒明加入TVB由最基層的公關助理做起，主要負責剪報和抄寫節目表，培養每日睇報紙的習慣。「到今日都冇變，全港報紙都會睇，唔止娛樂，港聞、財經、馬經都睇吓，現在轉到香港開電視做外事部顧問，同以前一樣冇太大改變。」
曾醒明形容昔日傳媒朋友與藝人之間關係密切，大部份的新聞報道都隱惡揚善，自《蘋果》出現，令業界帶來好大衝擊，積極進取的態度顛覆舊有的採訪模式，並加強「狗仔隊」的追訪爆料，促使業界增聘人手，可說是娛樂圈最鼎盛的時候。「以前讀者只係會睇到藝人最靚嘅一面，但娛樂新聞，大家都想睇八卦、juicy少少嘅嘢，特別係男女之間嘅愛情故事，甜蜜鏡頭，讀者觀眾睇得開心，電視台嘅娛樂新聞都係咁衍生出嚟。」而藝人對《蘋果》可說又愛又恨，他說：「要睇個人際遇，有啲真係《蘋果》幫咗一把，增加曝光同提升名氣；但如果有負面嘢，《蘋果》一出，差不多全世界哄動，咁就啄住佢，處理得唔好，就變咗好嚴重。」
被傳媒形容為「最強公關」的曾醒明，坦言多年來處理過最棘手的問題，肯定是2013年TVB封殺壹傳媒。至今7年，仍未能解決，成為他心中一件憾事。「個結到今日都解唔開，雖然我離開咗TVB，但我覺得係一個遺憾。因為以我作為一個對外事務或企業傳訊人，廣結善緣，成日掛喺嘴邊，多一個朋友好過多個敵人，可能嗰個朋友未必幫到你，但少一個敵人，我哋會少一個攻擊。如果本身公司做得幾好，但同某啲傳媒關係唔好，似乎都好似有啲美中不足，特別喺外人嚟睇，唔係百分百咁完美。」
封殺行動前，TVB不少劇集和節目都有賴《蘋果》幫手宣傳，曾醒明形容兩者關係一向好好，直至2013年11月19日的台慶前夕，一夜變天。他說：「當年有個免費電視發牌，站在TVB立場，一定要保障自己權益，正所謂多個香爐多隻鬼。當時壹傳媒主張百花齊放，明顯站在王維基先生嗰度，唔緊要，每間報館都有佢嘅立場。但TVB感覺到佢處理發牌期間係偏幫王維基先生，無形中對TVB有啲不利嘅嘢引發出嚟。」無綫覺得《蘋果》煽動全港在台慶夜熄機，而當晚有逾百人在電視城門外放紙紮公仔及撒溪錢，當時作為TVB的一分子，曾醒明亦覺得好難受：「台慶如同每個人嘅生日，對台前幕後嚟講係好大侮辱。當年平均收視29點，係咁多年中比較遜色，但最重要係阿叻（陳百祥）跪（回家）返去，再引起全城話題，TVB覺得係你哋號召去杯葛，尤其係針對屋企有收視調查嗰啲去熄機，咁好影響廣告商，對TVB生存空間有好大衝擊……過咗11月19日，上至下都有個咁嘅決定（封殺）。」自此，《蘋果》提起無綫就叫「大台」、網民稱TVB為「CCTVB」，於《蘋果》，沒有敵我，只有真相。
封殺令至今未解，再眼看今天，「港版國安法」殺到埋身，曾醒明認為此時此刻《蘋果》更應該要存在：「《蘋果》好多人唔鍾意，但《蘋果》嘅存在，代表香港本身嘅多元化、言論自由。我諗生活喺香港嘅所有人，大家都係想安居樂業，就算在『一國兩制』之下，係咪都能夠維持到當初講嘅50年不變呢？我諗香港人好簡單，總之生活穩定，過返安穩生活，千祈唔好搞到我檔攤！」
攝影：仇志德
曾醒明覺得《蘋果》的存在，代表香港本身的多元化及言論自由。
曾醒明曾服務無綫超過40年，習慣每日都睇晒全港報紙。
當年有網民發起台慶熄機，TVB遷怒於《蘋果》。（資料圖片）
當年有市民帶備紙紮到電視城門外。（資料圖片）
阿叻當年揚言若台慶收視只得2、3點，便由將軍澳跪住返屋企；最後收視有29點，雖然較遜色，但阿叻亦可鬆一口氣。（資料圖片）