韓國天團BIGBANG除咗喺亞洲爆紅外，喺國際市場上都為人認識，近日佢哋就入選咗美國著名經濟雜誌《福布斯》評選出「2016年福布斯全球百大名人榜」其中一位，成為韓國音樂史上嘅新紀錄，亦都係首次有韓星打入全球百大名人榜。

《福布斯》對BIGBANG去年進行嘅美國公演規模及收益進行咗集中報道，單係去年稅前收益BIGBANG已達4,400萬美元(約3億4,200萬港元)，甚至勁過美國樂隊Maroon5嘅3,350萬美元(約2億6,000萬港元)，隊長G-DRAGON受訪時就話：「超過咗Maroon5我都覺得好吃驚。」而完整版排位就會喺12號正式公佈。

另外，噚晚喺廣州開騷嘅BIGBANG，今年係佢哋出道十周年，所以搞作多多，早前已宣佈會推出紀錄片電影《BIGBANGMADE:THEMOVIE》，除咗韓國有得睇外，港迷亦都有福，電影將於本月29號喺本港上映。