葉翠翠有喜，最緊張嘅一定係老公Raymond，除咗出街當正老婆係「受保護動物」之外，翠翠仲爆老公知道佢有咗之後發生唔少趣事，每次做婦科檢查老公都要同佢一齊去，有次去做檢查，BB其實只有2cm大，老公都話BB好似佢，就連醫生都忍唔住笑。

甚至驗到懷孕嗰日其實亦有笑料，翠翠話：「知道嗰日係朝早，但係我忍住唔講，等到差唔多黃昏6點打俾老公，話俾佢知我好唔舒服，叫佢即刻返嚟，其實我已經喺廁咗set咗個壇，放好晒啲驗孕棒，同埋又寫住『I am pregnant』，我叫佢幫我入去攞廁紙，點知佢幾次都見唔到，到佢見到就以為我整蠱佢，我話俾佢知係真，條線唔係假嘅，佢呆咗，之後感動到喊，我見到佢咁都好感動。」

其實翠翠都只係有口話人，因為佢自己都緊張到痺，事關原來佢口中「放好晒啲驗孕棒」係講緊唔係一枝，而係用咗3、4打唔同牌子嘅驗孕棒，都咪話唔誇張，不過人生第一次緊張係好正常。

問到翠翠打算順產定開刀？佢話已經決定咗係開刀，因為自己有少少驚，佢又話：「醫生話我BB比一般呢個周數嘅BB大，證明之前補身冇白費。」據知，翠翠老公知道佢有咗興奮到爆，但就一直忍住唔同任何人講，等到老婆夠3個月，第一時間返公司宣佈喜訊。