港股喺前星期五開始回升，升咗差唔多一成，喺𠵱家呢個水平去買藍籌股，可以上升嘅水位唔多，據市場班期指炒家所講，大市喺呢個位要造落嘅話，隨時可以有600零點，反而向上造就只有200點左右，所以佢哋已經隨時準備掉頭造淡，只爭在美股幾時回軟，打算買藍籌股博反彈嘅炒家要非常小心。
早前市場傳聞過有猛料跟尾嘅中建海爾（1169），似乎喺跟隨大圍市回落至0.12元水平後已經跌夠，唔經唔覺重喺上個禮拜五升返去0.13元。
中建海爾傳玩多元化
隻股仔之前吹緊嘅注資行動聽聞重會繼續，有知情人同伏勝講，隻股仔嘅阿媽有啲嘢搞緊，好似係關隻1169事，不過同佢哋嘅本業無乜關係，話要玩業務多元化。咁發展落去，分分鐘畀佢哋做咗中國嘅「通用電氣」。線人話，海爾已經指到明話1169係佢哋喺香港嘅旗艦，有乜好嘢自然會先益佢，以中建海爾而家個價嚟睇，下跌空間有限，大家不妨諗吓之後會有啲乜嘢故事會發生。