今日年初二，福臨門常客大劉(劉鑾雄)同女友甘比(陳凱韻)都如常去福臨門食開年飯，目到大劉手持拐杖，由甘比扶住行入飯堂，之後大劉女兒劉秀融亦都有嚟。

食咗約一粒鐘之後，大劉一家人就出嚟，今日甘比著住鬆身裙同平底鞋，忽然轉look，散發一陣孕味，搞到大家都猜測佢係咪再度有喜。不過今日福臨門就出現罕有畫面，雖然大劉係福臨門忠實粉絲，但極少喺福臨門食晚飯，今日就去足兩次，午餐食完夜晚再「翻啅」，最巧合係，佢嘅舊愛李嘉欣今晚都同樣去到福臨門食飯，平日李嘉欣就好少去福臨門，今晚佢就同夫家許世勳一家食開年飯，嘉欣身穿黑色上衣同紅色半截裙，同老公許晉亨到嚟，亨亨仲好有風度為愛妻開車門，二人大方停低合照。另一邊箱，大劉一家就好似趕時間，食咗約五十分鐘「快飯」就離開，離開時大劉自己撐枴杖，步履尚算健步，由大女秀融在旁照顧。