現年35歲、去年憑網劇《反黑》中「招積」一角彈出嘅張建聲，今年4月突然喺社交網宣佈同「翻版吳千語」陳嘉莉（Kelly）分手，「分」訊同時被揭四角戀，有傳阿聲監製兼演出電影《作家的謊言》時，與33C日模松岡李那戲假情真，同時又暗撻34C「籃球女神」方泳琳（前名方詠琳），事後卻爆出阿聲情歸琳琳，兩人4月時「蜜」遊峇里。兩人經常結伴夜蒲，佢哋拍拖更成朋友圈公開秘密，事後傳到Kelly耳邊，才鬧至分手收場。（新聞連結： https://bit.ly/2M1urSI ）

阿聲當然例牌否認劈腿，佢強調同琳琳由細識到佢大，堅持如今單身。（新聞連結： https://bit.ly/2tb1Eo1 ）琳琳亦口供一致指跟阿聲自幼相識，佢話：「如果阿聲唔開心都會搵我成班friend去傾偈。」

今年4月，阿聲同琳琳仲玩緊地下情，可惜激情火速冷卻，幾個月短暫情緣又玩完，朋友圈近日傳出，琳琳上月已斬纜，兩人已冇聯絡。

琳琳日前仲同妹妹出遊日本療情傷，佢出發前喺社交網分享咗一張貼圖，圖中嘅文字寫上:「假如你用對方對待你的方式來待他，恐怕他早就不滿了，受不了了，離開了，因為人家未必有你的大度。很多事情明明不用講破，只要將心比心，就能明白其他人的感受，偏偏他在每次忍心你的時候，總是沒有考慮過你的感受」。文字中現分手玄機，琳琳轉貼後再抒發留言：「將心比心很重要，無論親情友情愛情，我好珍惜我身邊將心比心嘅人，多謝你們。」

琳琳上周離港前，喺機場打卡兼留言：「自會發現世上沒有童話式人生。」仲hastag「#得到同樣快樂彼此亦有沮喪，#童話書從成長中難免要學會失望。」

琳琳日本此行吃玩樂，釋放自己，佢仲去咗浸溫泉。重新出發嘅琳琳近日仲聽相士改咗新名，將「詠琳」字改為「泳琳」，希望轉運，以後事業愛情樣樣都順景。至於阿聲日前就喺Ig貼咗張抵港落機後喺行李輸送帶前等行李相，佢留言：「Home,so alone。」大嘆寂寞。

就分手一事，琳琳今日回覆《蘋果》時話：「朋友就冇話一齊定分手嗰啲嘢嘅，同埋我同佢呢排少咗聯絡，我又忙啦，佢又好似好忙咁，佢嘅近況我都冇update。」

精選娛聞，喺晒《娛果》
http://fb.com/appledailyent