馬匹轉換馬房，幾乎每日都有發生，在不同的訓練手法之下，馬匹容易產生新鮮感，尤其是出賽次數多的舊馬，只要健康正常，呢類轉倉馬通常都能夠交出好表現。

以上季贏65場的羅富全為例，接手訓練前吳廐馬「鑽之友」及「銘記心中」，前者上季六歲連贏三場，後者上季七歲開齋兼且贏了三場，而另一匹前吳廐兵「肇慶威威」，上季七歲亦贏兩場。

今季新開倉的丁冠豪已贏四場，包括「銀城福星」、「勝利寶石」、「飛壹般」及「幸運神駒」，後三駒分別來自今季未獲續牌的告達理及李易達馬房。連同上期日賽爆冷的「佳運來」，今季已經有三匹前李廐兵轉倉初出即勝，呢類出自散倉馬房的舊馬，絕對要吼實。

列陣第五場三班1400米的「勝利導航」，與季內勝出或上名的前李廐馬「佳運來」及「南莊加寶」一樣，現時由徐雨石訓練。

「勝利導航」上季11戰只得2亞，但曾經在二班跑田草1600米，僅以短馬頭屈居亞軍，目前評分比當時低九分，暑期獲多減四分，得以降落第三班出賽。

轉廐後晨課通常由老拍檔楊明綸經手，但因他被罰停賽的關係，今仗改由吳嘉晉上陣。9月4日試1050米泥閘，路程嫌短亦追得勁，末段推騎反應佳，馬身肌肉收得結實，與在上手馬房時相比，現時的觀感簡直判若兩駒。今場季內初出憑新鮮感跑田草1400米着數，呢匹李廐寶藏馬值得捧場。