演而優則導、日前憑自導自演嘅電影《空手道》入圍第13屆大阪亞洲電影節「競賽單元」嘅杜汶澤，喺當地開簽名會，吸引唔少影迷捧場（新聞連結： https://bit.ly/2Gog4cf ），佢仲攞埋大會頒贈嘅「亞洲明星大獎」（Asia Star Award），雖然後尾個獎被杜太田蕊妮唔小心失手「開花」（新聞連結： https://bit.ly/2pGkCRL ），但都係件值得開心嘅事。

原來，阿澤早前接受《日本經濟新聞》訪問，嗰篇文稿主題係「香港電影 強烈本土味」，文中有提及香港電影相比起1980至90年代、以功夫、喜劇及警匪片當道嘅光輝年代，近年失去光環，可能係因為同中國大陸合拍片增多，令到主題及故事內容受到限制有關。該文中更提到成龍於本月初，喺出席「全國政協十三屆一次會議文藝界別舉行小組討論開放日」時提到「只有一種電影，叫『中國電影』，香港電影，也是中國電影」嘅言論（新聞連結： https://bit.ly/2FkfPiI ）。

《日經》嘅記者訪問身兼導演和演員嘅阿澤點睇香港電影，阿澤就批評老一輩：「那些老手認為電影只是一個賺錢的方法，而且都走到中國去掘金了。」而阿澤又認為：「香港電影是即興而奔放無拘束的，去製作以本士文化作題材的廣東話電影，是土生土長的香港人的社會責任。」

該文記者再問到阿澤覺得香港電影要重回黃金年代係咪好難？阿澤話：「仍然相信會有奇蹟」。

精選娛聞，喺晒《娛果》
http://fb.com/appledailyent