當年今日
關於我們

中環在線:雙失波得閒湊女開學 - 李華華

蘋果日報 2012/07/05 00:00


CY重組政府架構嘅議案喺立法會打尖失敗,「五屍實死局」趕唔切7.1「浮現」,盛傳係新設財政司副司長嘅立法會會計界議員陳茂波好快變成「雙失」,今個月中立法會休會後,佢再唔係議員,又未係副司長,真係好得閒。
得閒有得閒好,聽講陳生打算8月中陪阿女Joyce去美國等開學。陳茂波好錫一對仔女,大仔James舊年喺英國讀完大學回港,家喺一間律師樓邊考牌邊學嘢,細女今年9月去美國讀大學,修讀文科,陳生係廿四孝阿爸,加上「雙失」,去美國行番轉都好嘅。
如果陳生真係8月去美國,最開心嘅,應該係打算9月參選立法會會計界議員嘅梁繼昌,事關陳茂波一早搵定接班人林智遠去選立法會,好似佢一出聲,班選民就一定會投票畀林智遠咁,陳茂波行開陣,林智遠少咗個主力幫佢助選,梁繼昌梗開心啦。