於神劇《來自星星的你》飾演「千頌伊」細佬嘅29歲男星安宰賢，前年拍攝劇集《Blood》時撻着同劇拍檔具惠善，兩人去年5月成婚，相當幸福，之前更合體拍攝真人騷《新婚日記》高調放閃。雖然目前兩人都仲未有小朋友，不過安宰賢就已經諗到好長遠，甚至表示未來唔接受囡囡拍拖，亦唔能夠接受佢帶男友返屋企。

安宰賢有份拍攝嘅綜藝節目《新西遊記》第四季噚日播出最新一集，由於拍攝當日係韓國嘅父母節，主持人之一嘅圭賢就越洋打電話畀屋企人，向父母表達愛意。及後一眾主持人閒談時，李秀根就問到安宰賢未來生B嘅問題，安宰賢表示：「如果我有囡囡嘅話，無論係點嘅男仔我都會覺得好普通。」而圭賢亦表示：「將來有囡囡的話應該會每日跟住佢，會一直等佢放學。」兩人被其他人取笑係「女兒傻瓜」，認真搞鬼。