啱啱禮拜日晚黑雨兼落冰雹，到咗呢一朝，天氣依然欠佳，沙田上空行雷閃電，雨勢好大，晨課當然大受影響，出操馬少咗好多，原定三組泥閘亦取消，不過落大雨無阻韋達嘅爭勝雄心，呢日佢有特別動靜，全朝冒雨操咗三駒，唯一周三有賽程馬就係尾場「好先生」，喺大圈跳一段。操完韋達走去烽火台，搵練馬師何良傾咗好耐，呢對組合今季合作唔多，但就贏過兩場，其中一場Ｗ「好加加」嘅馬主史佩加，正正係「好先生」馬主史立德嘅千金，所以「好先生」搵得韋達跑，相信應該有計。
睇番「好先生」，出咗名係游水馬，呢匹高班良駒2010年贏遮打盃一級賽，就係大雨下取勝，近日天氣咁差，其實啱晒佢，難怪韋達呢朝特登操吓佢，13屆冠軍冇死錯人嘅！