葉璇電眼秘密 晚晚貼雙眼皮膠紙

蘋果日報 2003/04/11 08:00


眼睛曉說話
眼睛黑白要分明
身邊不少朋友都話,葉璇最靚的地方是一雙眼,水汪汪,好鬼精靈,連她自己也同意。「眼睛最重要是黑白分明,唔好有血絲,平日多點滋潤雙眼,望落水汪汪都吸引啲啦!」咁講法,Michelle對眼咪攞滿分!
原來她對眼部護理好講究,除了晚晚勤塗EyeCream同敷眼膜外,最特別的,原來係臨瞓前一定要貼雙眼皮膠紙!
「經過我多年的研究和試驗,發現貼膠紙可以改善雙眼皮,貼得愈耐效果愈持久。」所以𠵱家Michelle晚晚都會黏住雙眼皮膠紙瞓,日積月累下,佢話雙眼皮真係深咗!大家都不妨試試。
無BabyFat身形Fit晒
記得初出道時的Michelle,雖然說不上肥妹,不過身形略胖,而且面龐脹卜卜,今日身形細了一個碼,看來清減了些。「其實我從來沒有試過刻意減肥或節食,清減的原因,可能跟BabyFat消失了有關。」Michelle重話,心目中想Keep至105磅:「到時應肥的地方肥,應瘦的地方瘦就最好。」
做足防曬工夫
葉璇是杭州人,皮膚保養得好,但她說小時候在家鄉都只懂飲白開水,並沒有任何護膚意識。「聽人說過杭州人飲的是地下水,有好豐富的礦物質,多飲皮膚會靚,所以皮膚一直都Keep得好滑。」
不過到香港後日日要化妝工作,加上香港沒有地下水,就算幾天生麗質,平日都要勤加護理,尤其防曬工夫她一定做足。「我好易曬黑,每次出外景我都會勁用防曬用品。最厲害一次是在日本一間藥房,買了一支高達SPF130的防曬產品。」
指甲畫花至愛鮮色
除了面部,葉璇亦好着重手部護理,平時會用甘油加砂糖磨手,去死皮兼可令皮膚潤滑,做完護理重會同手指扮靚靚㖭!除此她還會四出搜括心水指甲貼紙:「春、夏天最好揀花花圖案,顏色就以黃、青綠、粉紅等色為主,夠清新。」
護膚品放雪櫃
Michelle愛研究護膚,閒來都會自製護膚品塗面。「第一次DIY,係在美國萬聖節時俾人擲雞蛋,返屋企洗頭時,發現頭髮滑溜咗,之後就一直嘗試。」其他還包括敷蛋白幫助緊膚、用檸檬汁加水洗面美白,或者用西瓜皮洗面等,都係簡單而且便宜的方法。最特別的反而在她的雪櫃內,有一格位置是專門擺放護膚用品,她說一來雪凍用夠舒服,二來可以Keep得久些,唔怕過期。
查詢:
Boots27389140
RMK28106690
Covermark25040939