(新增回應)

佘詩曼由選港姐入行，被指雞仔聲到後嚟演技被讚，當中阿佘真係落咗唔少苦工，近年喺大陸發展，有價有市，不過感情世界就dry過沙漠，42歲早已步入中女之齡，戀情多年都逃唔出「見光死」嘅命運，每次一公開咗就唔長久，俗語話見過鬼都怕黑，o依家阿佘拍拖都學識「保密」!

今日有周刊指，阿佘原來同一個型男拍咗拖一年，呢個「黃金盛女」原來有着落，為咗保護戀情，之但係佢春風滿面，又點呃到人，阿佘喺年初忍唔住同朋友透露自己拍拖，不過佢就醒咗，冇講男友嘅背景，亦得好少朋友見過，同男友現身一定係前後腳，況且阿佘喺大陸搵埋唔少人仔，又盛傳有大陸富豪狂追，唔怪之得佢早前出騷堅稱一直有滋潤喇!

不過，佘詩曼今日短訊回覆《蘋果》否認其事﹕「好多謝你哋咁關心我嘅幸福，向來大家都知我喺朋友圈好活躍，男女性朋友正常交往聚會經常都有，但現在真的好忙，未有時間拍拖，他日我公開得，一定係我最愛！多謝大家嘅祝福。」