花旗股市前晚反覆微升，投資者情緒轉趨觀望，噚日日股嘅情況都係差唔多，睇嚟市場等緊新消息。
港股前日呈單日轉向，噚日未能再升，恒指跌121點，但指數守穩24000關，報收24014，日線圖現陽燭，成交縮減，屬偏好嘅發展，從技術角度睇，下禮拜恒指上試高位機會仍大。今日內地公佈通脹數據，應該會為市場帶嚟炒作藉口。
中集C輪29418：中海集運（2866）平收3.37元，晏晝上過3.46元高位，不過尾段回落。股價前日以大成交上破保歷加通道頂，噚日出現錘頭，未破壞向上走勢，尾段有壓價手影，相信好快會再炒上，目標3.60至3.70元，可以諗吓隻C輪29418。
隻輪現價23仙，2011年10月4日到期，行使價3.98元，溢價24.9%，引伸波幅46.7%，槓桿率14.7倍（有效5.3倍），正股升上3.70元，29418睇36.9仙，升幅有6成，正股跌穿3.22元就沽咗隻輪。
俊樺