秋風送爽，費清身邊好多friends都趁周末外出踩單車、跑步、行山，仲好醒目咁戴住太陽眼鏡遮光；點知聰明反被聰誤，唔少人係用玻璃太陽鏡做運動、踩單車，一個唔小心炒車，好容易撞爆眼鏡傷眼。

點樣揀一副合適運動型太陽眼鏡？呢幾日灣仔會展舉行眼鏡展，費清咪入去搵啲專家請教吓。今年眼鏡展其中一個亮點係運動太陽眼鏡，有單車王國之稱台灣就有唔少運動太陽眼鏡公司嚟參加，其中台灣四大品牌之一既「ICECUBE」四眼哥Selwyn話，公司做運動太陽眼鏡40幾年，近年開始自創品牌，「外國牌子的太陽眼鏡不少，但做給外國人，所以創立自家品牌，做一副適合東方人面形的眼鏡。」

佢解釋，亞洲人既輪廓較外國人淺、鼻較扁，如果買錯咗一副鬼佬面形眼鏡，塊鏡片會壓住面頰，長時間咁戴好唔舒服；唔啱面形會出現漏光情況，防唔到太陽光。

Selwyn教路，踩單車、跑步千唔好戴玻璃太陽鏡，要選用聚碳酸酯物料，優點係防爆裂、抗衝擊，又夠輕，「ICECUBE用上美國軍軍車擋風屏的Trivex物料，抗爆能力及柔韌性好高。」佢話口未完，將手上既太陽眼鏡用力捏埋一塊，跟住又放手，鏡片又恢復原狀。嚇咗費清一跳。

佢又話，運動太陽眼鏡除咗要防爆，最好有埋變色功能，好似由朝到晚踩單車，有時又經過隧道，唔想停車換鏡片，就要買副按唔同強弱紫外線變光變暗鏡片。佢即場示範，用紫外光燈射去透明鏡片，塊鏡片即刻變暗。費清拎副鏡去戶外曬太陽，睇住塊透明鏡片好快變灰片，好盞鬼。

Selwyn話，唔少香港人嚟台灣踩單車車，都會嚟單車店買佢哋啲太陽眼鏡，其實網購仲方便，寄埋嚟香港，「外國品牌專業運動太陽眼鏡，動輒二、三千元，台灣品牌可以平一半。」來自台南既太陽鏡生產商Millson負責人Jess補充話，一副好既太陽眼鏡仲可以防霧同有氣孔排汗添。

原來一副運動太陽眼鏡咁多學問，費清又學到嘢；有興趣咪今日嚟灣仔會展睇一睇。

費清＃要生計，也要生活＃毋忘初衷