古語有云，解鈴還需繫鈴人，不過喺中國官場嚟講，繫鈴人同放箭人大把，佢哋往往繫完鈴、射完箭就鬆人，之後就唔關佢阿哥事，實行闊佬懶理。
好似香港民主派冇得過深圳橋，搞手肯定已經退晒休，甚至去咗見馬克思，但係佢哋就從冇諗過當年遺留落嚟嘅問題點解決。
煲呔參選時下巴輕輕話要帶晒班議員，不論背景出身，返回祖國大地，實在都幾大膽，最後真係成事，雖然只係去珠江三角洲，都算係解咗個鈴，點都值得加番一兩分嘅，等佢民望唔使只跌不升。

老董留個波畀煲呔射

馬丁同楊森同八方大讚煲呔，一個話佢醒目，一個話佢新人事新作風，當然大家都笑老董錯失良機，「留低個波畀煲呔射」，其實佢老哥當年唔爭取啫，否則冇理由只得劉千石一個返到去探阿媽。
煲呔讚佢個下屬肥龍許仕仁叻仔，今次到佢自己叻番次，有人話，呢啲好消息都係同曾慶紅訪港前，營造和諧氣氛有關，如果係，冇問題，不妨叫佢阿叔多嚟幾次。
老實講，班立會議員冇得北上真係大笑話，因為佢哋係按《基本法》產生，中央有乜理由唔見佢哋？煲呔噚日出嚟攞晒分，佢位橋王肥龍又潛晒水不見了。原來肥龍同人形容，佢係煲呔嘅擋箭牌，所有暗箭明箭由佢嚟接，等煲呔可以多啲時間同空間做吓實事。

唔成功都「死得眼閉」

係人都知肥龍精過鬼，佢話自己係擋箭牌其實有雙重意思，識聽嘅議員話，佢咁講即係暗示政改以至西九佢唔話得事啦，既然係咁，不如就畀啲議員同北京直接對話，好過大家喺度「對龍彈琴」，話晒《基本法》規定要過三關，冇理由只得中央同特區閂埋門傾掂主流方案，香港人只可以話接受或者不接受。
班議員想搵中央官員對話，不過，今次煲呔只係安排佢哋見地方官黃華華，湯家驊梗係認為唔夠，佢話最希望都係可以六十位議員都可以上京，而政改問題，希望三方有機會交流意見，就算最後唔成功都「死得眼閉」。
曾副主席下個月訪港幾日，但係最當紅嘅45條關注組都未收到邀請。八方認為，既然中央請晒全體立會議員返內地考察，認識吓祖國新面貌，睇怕范太都應該識做回禮，請曾副主席去立法會坐吓，聽吓班議員噴口水，曾副主席可能會另眼相看，發現班議員只係人一個，冇乜可怕。


爆料熱線：29290000、27860099
報料傳真：26239278
報料電郵：[email protected]