陳志雲為亞視主持嘅《百萬富翁2018》，今日安排傳媒去咗睇個廠景，而且仲搵咗行政總裁吳雨去咗試玩！

睇到今次廠景佈置、主持人嘅服飾，基本上同當年陳啟泰主持嘅《百萬富翁》好相似，甚至連遊戲玩法都係大同小異。其中兩條保險線係六萬蚊同八千蚊，越過保險線代表參賽者所獲得嘅最低金額。參賽者由$1,000問題開始答起，如果答啱就會升級到下一關，答錯就獲得保險線嘅金額，如果低於第一條保險線就唔可以獲得獎金。參賽者可以選擇喺自己挑戰完成嘅金額中拎支票離開。

參賽者有三錦囊，分別係：

50.50 ─ 電腦隨機剔除兩個錯誤答案
打電話 ─ 由官方接通參賽者選擇嘅智囊團，電話有30秒通話時間
問現場觀眾 ─ 由全場嘅現場觀眾選出答案，並列出觀眾選擇嘅百分比

整個遊戲過程，每個錦囊只係可以使用一次，但可以喺同一條問題連續使用多個。

喺試玩嗰陣，吳雨玩咗兩條題目，佢先挑戰$6,000題目，之後再挑戰$10,000題目，就係「連續性合約受僱女性僱員，可享有多少星期有薪產假？」呢條問題。吳雨笑言：「我太太嗰陣時未有呢條條例。」所以用咗50/50錦囊。佢嘅最後答案係9個星期。

陳志雲就笑吳雨：「你公司有冇女僱員0架？咁都答錯，唔知你點做行政總裁0架。仲有好多電視台搵我做高層0架。」吳雨就話：「呢啲係人事部搞0架嘛！」正確答案係10星期。

更多娛聞，喺晒《娛果》
http://fb.com/appledailyent