沙田彭福公園今日成地復活蛋，好有節目氣氛，原來係香港賽馬會舉行嘅「同心同步同樂日」環節之一，小朋友可以應節地掘復活蛋。綜合沙田馬場同彭福公園兩地點，今日就吸引咗逾15,000名市民參加。

今日起一連三日舉行嘅同樂日，提供70幾項寓教育於娛樂嘅活動及遊戲與市民同樂，希望連結社區，宣揚「我做得到」嘅正能量。重點活動係挑戰健力士世界紀錄，馬會邀請約千名參加者，喺香港著名藝術家及兒童繪本作者鄧子健帶領下，成功挑戰「最多人同時為雕像塗色」嘅世界紀錄，佢哋親手完成咗951隻小型馬匹雕塑，獲健力士世界紀錄評審員即場確認，並隨即頒發證書。