今日係初七人日，意即人人生日咁解。有見及此，《數碼影音》特別搜括一堆市面熱賣緊嘅DC，再以抵玩「蘋果價」介紹畀讀者，等大家𢭃完利是，以超筍價掃番部至愛靚DC，開開心心過人日。其中更包括SONY近日熱賣嘅薄機大芒王T1，比行貨價足足平成千蚊，讀者只需手持今日本版，到下列店舖即可享有超着數嘅「蘋果價」優惠。 記者、攝影：許福合　ImageGirl：Mandy

成日話SONY部T1好Hit，其實除咗因為掛咗SONY招牌、坐擁大量Fans外，睇外形設計實在好吸引，2.5吋巨芒就最搶眼，難怪一推出就成人氣產品。雖然T1用上510萬像素CCD，但大眾化路線跟同期幾部500萬像素相機，價錢就有一定差距，賣到$4,390，唔少用家都喊貴，今日呢個超低價就擺明益讀者，只要$3,380就可以拎走慢慢玩！不過入貨前就要提醒各位，呢次優惠只限水貨機，星期六有貨，限售30部，不過用落分別不大，不過日文Menu未必人人啱用，幸好店舖提供中文使用指南，要上手一樣容易。